.

Bruder Werner

Ich wil dem kriuze singen

(1227/28)

I

Ich wil dem kriuze singen

und dem, der drane die marter leit;

ich hân der werlde ûf kranken lôn gesungen leider vil.

Wie mac mir baz gelingen

an lange wernder saelekeit?

wes sol noch der gedingen hân, der vert, dar ich nû wil?

Nû schaffe ein ieslich wîse man,

daz sîn der engel pflege;

swie vil der tiuvel danne valscher liste kan,

der engel wert in doch der slehten wege,

(der schiuhet allez ungeverte): stîge, strâze und ouch die stege.

II

Ze trôste wart uns allen

von einer maget ein kint geborn,

der ist sîn selbes vater und ist ouch sîn selbes kint.

Wir wâren gar vervallen

und ze êwiclîcher vluste vlorn,

wir wâren in der vinster mit gesehenden ougen blint;

Wir sint von im ze liehte komen!

Swer daz behalten wil,

der helfe rechen, daz im ist sîn lant genomen,

sîn kriuze und ouch sîn grap: des ist ze vil

den gar verworhten, die dâ mit uns hânt ze leide ir reizenspil!

HILF MIT !!! Eigene Texte hochladen	|