Baile Bricín
-
The Vision of Bricín

 

Provisional edition (14 Dec 2005) 

 

Baile Bricín sund. Messe in Gilla Ríabach.

 

1. Boí Bricín i Túaim Dreccan aithliu Chorguis Césta móir aidchi Cásc, for·émid techt asa thig abbad dond eclais os lobur-som, co·cúala gáir muintire nime oc celiubrud na Cásc. Is ann at·rubairt Bricín: "A mmo Choimdiu, maso chóir lat, dom·iced úait foídem fírían co scélaib do ḟlatho." Íar sin táinic aingel in Choimded dia accaldaim eter midnocht 7 íarmérgi. Richis hi cinn cech meóir dó, co·mba réil dia rusc in bith ocus co·n-accae imbidiu muintire nime immon n-altóir ríchid. "Maith trá," ol Bricín, "ar ro·ír Día mo itche dam. Findamar úait cech turcbáil déodai crístaidi bias oc cumtach ecailse Dé co deired in domain."

 

2. "Mad [fn] ém," ol int aingel, "testa trian don mili i·tám co forcenn, ocus dano testatar secht mblíadnai dot ṡáegul-su tar éssi na h-algese for·fuirmis, ocus dano ní·ragae dochum nime ocus ní·raga túarae in chentair it churp co·ndechais d'écc ocus a tech i·taí méraid céin maras creitem i nÉrinn. Ocus dano ara·feisser a llín psalm ro·gabais ría tíachtain dam-sa, is é lín créisen bias for Érind, .i. óthá »Beatus uir« co·rrici »Miserere mei Deus quem conculcauit«."

 

3. "Cest trá, a bennachtaig", ol Bricín frissin n-aingel, "cía mac bethad cétna·thic díib sund ar tús? Innid dam co lléir!"

 

4. "Maith ém," ol int aingel, "biaid úair tidnastar la h-echtrannu íath fo·sílfai caindelbrechtaig n-éthgig dia·tadbastar conni caratraid fri lige leth tairbertair foiltchinn imm gnúisi caratraid fri lige lethḟolma, ar tinólfaitis slúaig fri foigge fungairi. Biaid dígal la h-ingreimm íar sin for ecailsib Dé combat ili uli comcum[th]aig Máel Brigte.

 

5. Biaid íar sin," ol int aingel, "flaith na téora manistrech findḟled comrair Conaild clainne ilchrothaig toirthigfes treba imma·chain/ri, costadfes imma chella cumtachta, bid suí, bid rí, bid epscop, bid lán linde dércae ocus trócaire.

 

6. Biaid dano in fubthaire a ocht déc ar trí fichtib de Loch túaid Gamenais dian chaínḟail-side, dia·mberae a dub i find .i. Tanaide mac Uidir." "Is trócaire Dé in sin," ol Bricín.

 

7. "Biaid dano in túaircnid imme·thuindseba fri domon ré a secht ar deich cét, co·tét écc ernbais fria fíana fortréna di rinnib rogargaib i n-indrechtaib Clúana." "Is trócaire", or Bricín. "Bendacht a dúlae ndóu!"

 

8. "Biaid dano óige cominad in command cráibdech. Níba cumscaicthech a ríagail ré sé fichit mblíadnae. Sech bid Dé, bid duine." "Is trócaire Dé in sin", or Bricín.

 

9. "Biaid dano in fríthe a (i?) faithche sílfas soiscélae do búaib, do thúathaib derccumtechaib re (fri?) téora mblíadnai ar trí fichtib." "Is trócaire Dé in sin", or Bricín.

 

10. "Biaid dano in túardenaid' na dá chlúain .i. Clúain Iraird ocus Clúain Mac Nóis re (fri?) téora mblíadnai ar ochtmogait. Sech bid Dé, bid duine. Bid demin do·géna bec do mór, do·géna mór do biuc. Tuirigein dá lethe in sin." "Is trócaire mór in sin", or Bricín.

 

11. "Biaid dano in tóebfhotae tanaide cromdercc eter Droing ocus Uisnech re (fri?) cóic mblíadnai ar ochtmogait. Míadaigfid ili ar leithet a dámraid. Bid brecc a ríagal, bid lín minéisc ocus móréisc." "Is trócaire ind Ríg in sin," ol Bricín.

 

12. "Biaid dano in cráebglas (crobglan?) i Mainistir re (fri?) noí mís ar nócha. Brogfaid a imthoíniud dar fairce. Bid sí in gem glainide ósin liic draconda." "Is trócaire", ol Bricín.

 

13. "Biaid dano int orcpeta (in torcpeta?) dubchas i suidiu Chomgaill re (fri) mblíadain ar chóecait. Ní·tibrea commus in talman ar apa in gairsécli."

14. "Biaid dano in crithchend Locha Con ré secht mblíadnai ar thrí fichtib, con·géba somataid, con[d]·scaílfea fri anairches amal lúaithred sliged." "Is trócaire mór", ar Bricín, "dond Ríg".

15. "Biaid dano in saintrebar Slébe Fúait co rríagail manchaidi, co crábud martir, co torbataid litáin, co comalnad a anmchairdi." "Is trócaire mór dond Ríg," or Bricín.

 

16. "Biaid dano in mallṡinech tiugsesse a Domnad ré cethri fichet mblíadna. Timarban rechtge for turu tóebderga, síthaigfid fri trillsi tríamaini." "Is trócaire Dé in sin", ol Bricín.

 

17. "Biaid dano in dublíath dóich, in nech de Loch Rí fod·canat na téora classa .i. clais Muman ocus clais Connacht ocus clais Úa Néill. Seis na trí suide, id est, suide Cíaráin ocus Comáin ocus Crónáin. Noí mblíadnai déc ar choícait a óes." "Is trócar ó Día in sin", ol Bricín.

 

18. "Biaid dano int ésca lethumae íarthair Macha .i. táidlech ar chrábud. Ocus is dub a ríagal re (fri?) trí fichtib mblíadnae. Mórfait a graigi ocus carpait. Saich maith (?) do chellaib crésen."

 

19. "Biaid dano in láebchoirnech cremloch ó Ṡléib Chuillind re secht (mblíadnai) ria maig is bódelb cecha cethrai". "Is trócar ó Día", ol Bricín.

 

20. "Biaid dano in broccainech bindchorach ó Loch Érne résin ochtmad mís co foraigsi maínigfid sini sceo óclacha, do·géna réid do aimréid."

 

21. "Biaid dano in clúimderg [a?] hInsi [Inse?] Muirethaich ré noí tráth ar trí fichtib mblíadna. Do·siph echtrannu a h-insib. Ad·andafa dia cháin téora frasa .i. fross flechaid ocus ḟross casra for lár Maige Coraind." "Is trócar Día fírién" ol Bricín.

 

22. "Biaid dano in clothamrae Clúana Éois re ochtmagait (m?)blíadnae. Línfaid Macha mórmaínib. Sústfaid sligeda Érenn graigib sceo cairptib, forda·ebla chaingnib ocus cháinib." "Is trócaire mór", ol Bricín.

 

23. "Biaid dano in ladanbél Dúin Lethglaise. Gignid eter Ros ocus Rinde ré sé mís ar chét blíadnae, aigidir ar ní·laimter muir bindithir crota."

 

24. "Biaid dano in clárainech Glinde Gemin ré cethorchait mblíadnae. Búaidrifid cech recht rodomain. Húathaigfid fri h-ulccu b[u?]idnécnedfid cáich."

 

25. "Biaid dano in buicellán Beinde Codail resin dechmaid [?] mblíadnai. Bláithidir scotha, gairbidir draigen." "Is trócar", ol Bricín.

 

26. "Biaid dano in táebḟota Tige Telli ré cethorchait blíadnae. Línfaid muilliu/muilidi ocus sesracha ocus áthai ocus lestrai ocus cuchtracha." "Is trócaire Dé in sin", ol Bricín.

 

27. "Biaid dano in gabalchend Cille Daigri re trí fichtib blíadnae. Fer borb, cráibdech, etail, anecnaid. Fo·cicher téora maisi .i. maise n-áenaig Talten, maise cána i n-Uisniuch, maisi mórchathach Érend i mMaig Léna." "Is trócaire Dé," ol Bricín.

 

28. "Biaid dano in cáelche[é]stach Slemna re nóchait blíadnae. Bid abb na trí n[-an?]glass, bid manach na trí ríagal, bid cró na trí forus." " Is trócar," ol Bricín.

 

29. "Biaid dano in dondainech a hAichi bes cubaid fri cech recht etir maith ocus olc, co ngnúis colmán cáda, co cridiu seboic, co nnirt tairb." "Is trócar," ol Bricín.

 

30. "Biaid dano in bán bíastaide Clúana Cáin re trí fichtib mblíadnae. Bid fáid tólai thúatae, do·géna sáercháin for slabrai." "Is trócaire cid ed," ol Bricín.

 

31. "Biaid dano in dóeldub Droma Tiprat re cethorchait mbliadnae ocus chethorchait mís. Míadaigfid cert, nenais soíri ecailse, sílfaid soscélae." "Is trócor," or Bricín.

 

32. "Biaid dano in súaschend Maige Bili re laithiu ocus mís ocus blíadain ocus sechtmogait blíadnae. Bid malla a dála, bid traiti a dígla, bid lonna a dígla." "Is trócar," ol Bricín.

 

33. "Biaid dano in clúasmarb Clúana nó Cúile Conáin (Cúil Cáenna?) re secht fichit mblíadnae. Glic a gillacht, mall a óclachus, dércach a sentu."

 

34. Biaid dano in cráeblíath ó Lusca re tríchait mblíadnae. Benfaid na trí banda, id est band crábaid, band ecnai, band trebaire." "Is trócaire," ol Bricín.

 

35. "Biaid dano in garbchuilchech Sliged Midlúachra re noí mblíadnai. Fuilcech (fuiltech, fuilech?), fidbadach, fand tosach a rechta, brec a medón, tend a deired." "Is trócor óm Ḟíadait," ol Bricín.

 

36. "Biaid dano in bairend becc a Brí Léith línfas ríagail Rómán re secht fichit mblíadnae, imalle con·géba ocus con·scéra." "Is trócor," ol Bricín.

 

37. "Biaid dano in gaimgelt Dairi Chalgaig gébas ríge Conaill co fo thrí ré trí mblíadnai ar thríchait. Fo·fáicfe Febal fo rindib sáeraib sainemlaib. Bid droichtech a ríagal eter Éirinn ocus Alpain." "Is trócor," ol Bricín.

 

38. "Biaid dano in builedach Tailche Tuirbe re trí fichtib blíadnae, bos de sunn, lám di alailiu, léim hi nem, léim i talmain." "Is trócor," ol Bricín.

 

39. "Biaid dano in cúlrúad Rois Chaim re sechtmogait mblíadnae. Is é sin in lía crédumai húasin loch lemnachta. Gélaid gach ros." "Is trócor," ol Bricín.

 

40. "Biaid dano in détgen Dairi, ut dixit hoc carmen: Détgen Dairi, firfid sel For bruindib Locha Dá Del. Ó Loch Dá Del is demin Ad·trebea Lochán Eidin. Ó Loch Eidin for tuiliu dochum Indais íar suidiu, cid íar tain con·ricfa fris ó Lusca do Daiminis. Ó Chrúaich maic Dara fo geil d'éis Choluim Dairi Chalgaig i téora aidchi fes ríg taidleba ailemnai Scrín. In suí, int espoc, in rí Síthaigfid cáin i mMaichi, Ticfaid [?] ó thúaid Dúine Bó Séoit Érenn is Alban dó. Tascar mara aidchi i mBuilt Tidnastar dó in n-Inbiur Ṡuird Bid ór, bid arcat, bid glain, Bid fín mbárc ó Rómánchaib. For lá midlachdae Dá Del cíasa ḟochen ní mochen, fochen ó áes chrábuid gil, ní fochen ó angbaidaib. A trí deich mairt Mugna Tidnastar a fírchumra Etir Rinni ocus Ros. Bid óenach dér ocus bos. Do·tuit íarum i railic dia mairt íar sacraific, bértair a thaisi co hÍi hi fail martrae Segíni. Cúic blíadnai tesbann dí dia chét in tan cinges ocus rachas écc." "Is trócor mór diar Fíadait in gein airechtae do chlaind."

 

41. "Biaid dano in lía ega (.i. Flann) húasin grís tendtide i Fobor. Bláith a lí ocus a chléircecht, imloiscthe immorro imon ndomon ré ceithri fichtib mblíadnae." "Is trócor," or Bricín.

 

42. "Biaid dano in fidbadach fuilech Clúana Fota. Réidigfid dorchae ocus aimréidi. Bid mog manchaine, bid dércach fri sochaidi, bid Dé, bid duine." "Is trócor", or Bricín.

 

43. "Biaid dano in búiredach Fathna Muru (.i. Fothad na Canóine) ré noí deich mblíadnaib. Selais na trí búadae .i. búaid n-ecnae, búaid ngaíse, búaid ngensa." "Is trócor", ol Bricín.

 

44. "Biaid dano in fírthobar búaiderthae a (i ?) Faidchi Sláine ré mblíadain ar trí fichtib. Troiscthech tredenach tidnoclach am bid résin dala húair, gleid ind úair aile." "Is trócaire Dé", ol Bricín.

 

45. "Biaid dano in sacart cruimthir Túama Fobair ré cethri fichtib mblíadnae. Bendachfaid cách, cách oca bennachad. Siais co cách, cách oc saighthin fair. Tidnaicfid cách, cách oca thidnacol." "Is trócaire Dé," ar Bricín.

 

46. "Biaid dano int abac Maige Belaig ré secht mblíadnai ar sescait. Bid sí in ḟínscoth i tóeb ind éccomthaind .i. caindel crábuid a topur pectha. Bid sí óenscéola na h-oircne ro·hort la díabul ó chéin."

 

47. "Biaid dano in crisḟúar ó Daiminis ré mblíadain ar nóchait, in seng séimide. Ní·ba conair laxae, léicfid toil ar ḟochraci, ní·cloat dála uili." "Is trócaire Dé," ol Bricín.

 

48. "Biaid dano int asnae tairberthae ó Chill ar Loch ré sé mís ar choícait. Da·n-airbéra a h-úaisli a cheniúil hi fán n-umalóite, reis fo glend ar chratib a anme; con·ocaib i n-húaisli a fírumalóiti." "Is trócaire Dé, damnae óige in sin," ol Bricín.

 

49. "Biaid dano in táebḟotae trednach Conderi ré secht mblíadnai ar thríchait. Bid óg a menmae ocus bid léir fri Día ó bid déolaidech tidnaicthech do doínib." "Is trócaire Dé," ol Bricín.

 

50. "Biaid dano in sanasach Átha Bláir blíadain ar chethorchait. Gébaid gíallu Connacht mí for trí blíadnai." "Is trócar."

 

51. "Biaid dano in garbainech Glinne Gemin (.i. Dúnchad húa Bruin) costaigfes na téora séisi .i. séis Adomnáin ocus Segéni ocus Coluim Cille ré noí tráth for sechtmogait." "Is trócaire," ol Bricín, "ó Día amne."

 

52. "Biaid dano int eséirgid Suidi Chaim .i. isre atas tormus do·béra scéla derba in todóchaidi. Móethaigfid cride dúra arind aisndís na ndemnae ocus inna n-iferndae ré ocht fichtib mblíadnae." "Is trócar," or Bricín.

 

53. "Biaid dano in cenn óir forsin colomain íarnda i Clúain Iráird .i. gnúis luchardae for colomain cestaig fri ré noí mblíadnae fo thrí co n-ecnu, co n-óigi, co ríagail." "Is trócar Día", ol Bricín.

 

54. "Biaid dano int ardmoltaid na fírinne a Inis Cloitgi ré cethri mblíadnai ar chethorcait. Bid é in cúach findruine forsin chrois lúaididi .i. túarascbáil torbae i ciund étarbai. Cairigfid claíni." "Is trócor", ol Bricín.

 

55. "Biaid dano in tanae téolaide Tuli Én re secht mblíadnae ar thríchait. Bid neictoinig, bid guis roguis. Bid orbae a chlíab toll, bid díuite ó chridiu, bes utmall etail." "Is trócar Día", ol Bricín.

 

56. "Biaid dano in muinemnach Macha. Bid moch a matan, bid fota a nóin. Bid táeb lethḟás leis, bes [bid?] lige lethḟúar, bid lasar chummascdae, bid cummae loiscfes dliged ocus indliged la dúiri a chrábuid ocus ar lagat a ecnai." "Is trócaire Dé", ol Bricín.

 

57. "Biaid dano in pauper pridchabas re trí mblíadnae ar thríchait. Biaid dano in bántipraite tor síthaigfes co h-uru Érenn. Is é benfas glas ndéidenach for íarcaini Érenn ocus is tiugbae creitme ocus crístaidechta in domuin sin." "Is mór uile," ol Bricín. Fri ré Áeda engaig genfes Tipraite, at·beir Baile in Scáil.

 

58. "Et cid bias and didiu?" ol Bricín. "Foraithmet creitme Ancríst", ol int aingel. "Ba trócar do Día", ol Bricín, "ná·tairsed lucht na h-inse-siu ind-sin." "Ní·tairsed éim", ol int aingel, "ar do·rat Día do Phátraic arin Crúaich in cethardae-sa .i. cen díth ecnai i nÉrinn co deired in domuin, et ná·trebfat echtraind ar áis nó ar éicin co bráth, et muir dar Érinn secht mblíadnae ré mbráth ocus corop é féin bas breithem for Goídelaib i lló brátha." "Deo gratias", ol Bricín. "Amen", ol int aingel.


Author: David Stifter
Last change: Martin Braun, 20.10.2012