Ich wirbe umb allez daz ein man (Reinmar der Alte)

Aus elib.at
Wechseln zu: Navigation, Suche

.


Reinmar der Alte


Ich wirbe umb allez daz ein man


Ich wirbe umb allez daz ein man
ze wereltlîchen fröiden iemer haben sol.
daz ist ein wîp der ich enkan
nâch ir vil grôzen werdekeit gesprechen wol.
lob ich si sô man ander frowen tuot,
dazn nimet eht si von mir niht für guot.
doch swer ich des, sist an der stat
dâs ûz wîplîchen tugenden nie fuoz getrat.
daz ist in mat.
Si ist mir liep, und dunket mich
daz ich ir volleclîche gar unmaere sî.
nu waz dar umbe? daz lîd ich,
und bin ir doch mit triuwen staeteclîchen bî.
waz obe ein wunder lîhte an mir geschiht,
daz si mich eteswenne gerne siht?
sâ denne lâze ich âne haz,
swer giht daz ime an fröiden sî gelungen baz:
der habe im daz.
Und ist daz mirs mîn saelde gan
deich abe ir redendem munde ein küssen mac versteln,
gît got deichz mit mir bringe dan,
sô wil ichz tougenlîche tragen und iemer heln.
und ist daz siz für grôze swaere hât
und vêhet mich dur mîne missetât,
waz tuon ich danne, unsaelic man?
dâ heb i'z ûf und legez hin wider dâ ichz dâ nan,
als ich wol kan.



HILF MIT !!!
Typewriter Mac.png
Eigene Texte hochladen

Flattr this

|

[ Autoren ] · [ Werke ] · [ Literatur ] · [ Land ] · [ Themenkreis ] · [ Uni-Fachgebiet ] · [ Rezension ] · [ Tools ] · [ Schlagwort ] · [ Community ]